FSDK dhe Banka Botërore dakordojnë vazhdimin e bashkëpunimit për vitin 2022

Në kuadër të vizitës në Kosovë të Qendrës Këshillimore të Sektorit Financiar të Vjenës (FinSAC) të Bankës Botërore, znj. Arijeta Neziraj Elshani priti në takim përfaqësuesit e këtij institucioni të kryesuar nga z. Vahe Vardanyan më të cilët diskutoi lidhur me aspektin e sigurimit të depozitave si dhe rolin e FSDK-së në ndërhyrjet e jashtëzakonshme në rast të zgjidhjes së bankave. Në këtë drejtim znj. Neziraj Elshani, informoi të pranishmit lidhur me aktivitetet e FSDK-së përgjatë vitit 2021 më qëllim të mbrojtjes së depozitorëve dhe sigurimit të stabilitetit financiar të sektorit bankar.

Në këtë takim, znj. Neziraj Elshani theksoi rëndësinë e asistencës teknike të ofruar deri më tani nga FinSAC-u ndaj FSDK-së dhe theksoi kërkesën për mbështetje edhe për vitin 2022 në drejtim të forcimit tutje të sigurimit të stabilitetit financiar në sektorin bankar. Ndër të tjera si çështje që u adresuan ishin implementimi i kornizës së menaxhimit të rrezikut me fokus në vazhdimësinë e biznesit, krijimi i kapaciteteve dhe njohurive lidhur me ndërhyrjen e jashtëzakonshme në rast të zgjidhjes së bankave si dhe çështje tjera që ndërlidhen me kornizën ligjore të FSDK-së.

Në fund të takimit, znj. Neziraj Elshani falënderoi përfaqësuesit e Bankës Botërore për mbështetjen e vazhdueshme të ofruar nga ana e tyre me qëllim të ngritjes së kapaciteteve dhe njohurive në fushën e sigurimit të depozitave.

Pjesëmarrës në këtë takim nga Banka Botërore ishin: Vahe Vardanyan, Specialist Udhëheqës i Sektorit Financiar, Nan Zhou, Specialist i Sektorit Financiar, dhe Juan Ortiz, Specialist i Lartë i Sektorit Financiar. Ndërsa, përfaqësues nga FSDK-ja ishin: Arijeta Neziraj Elshani, Drejtore Menaxhuese, Vllaznim Bytyqi, Zyrtar i Lartë Financiar, dhe Albulena Aliu Fetai, Zyrtare e Lartë për Mbrojtjen e Depozitorëve dhe Bashkëpunim Ndërkombëtar.