Komunikatë për shtyp

Back to top

FSDK prezantoi planin e ri strategjik në tryezën e diskutimit organizuar nga Shoqata e Bankave të Kosovës

Komunikatë për shtyp

Me ftesë të Komitetit të Financave të Shoqatës së Bankave, përfaqësuesit e FSDK-së morën pjesë në takimin e përbashkët për të prezantuar Planin Strategjik të FSDK-së për periudhën 2025–2029. Ky takim i dha FSDK-së mundësinë për të shpalosur në detaje qëllimet e reja strategjike të cilat synojnë forcimin e mëtutjeshëm të sistemit të sigurimit të depozitave në Republikën e Kosovës.

Gjatë prezantimit, FSDK theksoi rëndësinë e bankave anëtare dhe Shoqatës së Bankave në zbatimin e planit të ri strategjik. Drejtorja Menaxhues e FSDK-së theksoi se një ndër prioritetet kryesore është forcimi i bashkëpunimit ndërinstitucional, me një fokus të veçantë te Shoqata e Bankave si organi kryesor përfaqësues i sektorit bankar.

Përfaqësuesit e FSDK-së shpalosën në detaje çdo qëllim strategjik dhe ndikimin e pritshëm të tij në forcimin e sistemit të sigurimit të depozitave, mbrojtjen e depozitorëve dhe mbështetjen e stabilitetit financiar. Qëllimet strategjike për pesë vitet e ardhshme përfshijnë avancimin e mekanizmave të financimit për të siguruar burime të mjaftueshme për kompensimin e shpejtë dhe efektiv të depozitorëve të siguruar, modernizimin e sistemeve dhe proceseve për të rritur gatishmërinë operacionale në përgjigje të shpejtë ndaj ngjarjeve të siguruara, si dhe zhvillimin e kapitalit njerëzor dhe automatizimin e proceseve përmes teknologjive të avancuara digjitale, duke siguruar efikasitet dhe mbrojtje kibernetike.

Për më tepër, FSDK është e përkushtuar në harmonizimin e akteve ligjore të sigurimit të depozitave me direktivat e Bashkimit Evropian, me qëllim forcimin e kornizës të sigurimit të depozitave dhe sigurimin e përputhshmërisë ligjore me standardet e BE-së. Përparësi e veçantë i kushtohet gjithashtu forcimit të marrëdhënieve ndërinstitucionale dhe bashkëpunimit ndërkombëtar, duke u fokusuar në krijimin dhe zhvillimin e partneriteteve bashkëpunuese, si brenda rrjetit të sigurisë financiare të Kosovës, ashtu edhe në nivel ndërkombëtar, me synimin për të forcuar më tej sistemin e sigurimit të depozitave.

Në mbyllje të takimit, u theksua se Plani i ri Strategjik i DIFK-së për periudhën 2025–2029 ofron një vizion të qartë për nismat e ardhshme, duke reflektuar përkushtimin institucional ndaj mbrojtjes së depozitorëve, stabilitetin financiar dhe zhvillimin ekonomik të Republikës së Kosovës.

Për të parë Planin Strategjik për periudhën 2025–2029, ju ftojmë të ndiqni linkun e mëposhtëm:

https://fsdk.org/fsdk-2/plani-strategjik/