Fondi për Sigurimin e Depozitave në Kosovë (FSDK) përfaqësuar nga Drejtoresha Menaxhuese znj. Shqipe Devaja mori pjesë në Konferencën Rajonale të nivelit të lartë të mirëpritur nga Banka Qendrore e Republikës së Kosovës (BQK)

Fondi për Sigurimin e Depozitave në Kosovë (FSDK) përfaqësuar nga Drejtoresha Menaxhuese znj. Shqipe Devaja mori pjesë  në Konferencën Rajonale të nivelit të lartë  të mirëpritur nga Banka Qendrore e Republikës së Kosovës (BQK) mbi Kripto-Pasuritë dhe Paranë Dixhitale, e cila mblodhi përfaqësues të bankave qendrore të rajonit, institucioneve financiare ndërkombëtare dhe autoriteteve rregullatore nga rajoni dhe më gjerë.

Konferenca shërbeu si një platformë e rëndësishme për shkëmbimin e përvojave dhe diskutimin e zhvillimeve më të fundit në financat dixhitale, kripto-pasuritë dhe inovacionin financiar, si dhe ndikimin e tyre në stabilitetin financiar, kornizat rregullatore, mbikëqyrjen financiare dhe mbrojtjen e konsumatorëve. Diskutimet theksuan nevojën për politika dhe korniza rregullatore të harmonizuara që mundësojnë inovacionin e përgjegjshëm, duke ruajtur integritetin e sistemit financiar, besimin publik dhe stabilitetin e tregjeve financiare.

Si pjesë e rrjetit të sigurisë financiare në Kosovë, FSDK vlerëson se zhvillimet në financën dixhitale duhet të mbështeten nga mekanizma të fortë institucionalë që kontribuojnë në ruajtjen e stabilitetit financiar dhe forcimin e besimit të publikut në sistemin financiar. Në këtë kontekst, një sistem efektiv i sigurimit të depozitave mbetet një shtyllë e rëndësishme për mbrojtjen e depozitorëve dhe për forcimin e qëndrueshmërisë së sektorit financiar në një mjedis gjithnjë e më dinamik dhe të dixhitalizuar.

FSDK mbetet e përkushtuar në përmbushjen e mandatit të saj për mbrojtjen e depozitorëve dhe kontribuimin në stabilitetin financiar, duke mbështetur njëkohësisht zhvillimet që avancojnë modernizimin dhe qëndrueshmërinë e sektorit financiar në përputhje me standardet dhe praktikat më të mira ndërkombëtare.